२० असाेज २०७९, बिहीबार
आउँदो निर्वाचनमा विद्युतीय भोटिङ मेसिन प्रयोग गर्ने तयारी, आयोगले गठन गर्‍यो कार्यदल
  • मध्यमार्ग

आगामी वैशाख ३० गतेका लागि तोकिएको स्थानीय तहको निर्वाचनमा विद्युतीय भोटिङ मेसिन प्रयोग गर्ने तयारी गरिएको छ। जसको सम्भाव्यता अध्ययन गर्न एक कार्यदल समेत गठन गरिएको छ।

विज्ञहरुसहितको बुधबार निर्वाचन आयोगमा भएको छलफलमा सम्भाव्यता अध्ययन गर्न कार्यदल गठन गरिएको आयोगका प्रवक्ता, सहसचिव शालिग्राम शर्मा पौडेलले जानकारी दिए। ‘आजको छलफलमा सम्भाव्यता अध्ययन गर्न कार्यदल गठन भएको छ,’ उनले भने, ‘कार्यदलको प्रतिवेदनपछि थप प्रक्रिया अघि बढ्छ।’

उनका अनुसार सञ्चार तथा सूचना प्रविधि मन्त्रालयका सहसचिव अनिलकुमार दत्तको संयोजकत्वमा कार्यदल गठन गरिएको हो। कार्यदललाई ७ दिनको समय दिइएको छ।

कार्यदलमा मन्त्रालय र आयोगसहित सूचना विभाग, उद्योग विभाग, आन्तरिक राजस्व विभाग, नास्ट लगायतका निकायका प्रतिनिधि सहभागी रहेका छन्।

कार्यदललाई विद्युतीय भोटिङ मेसिनको उपलब्धता, यसको विश्वसनीयता, प्रयोगको सम्भाव्यता आदिका विषयमा अध्ययन गरी प्रतिवेदन बुझाउन भनिएको छ।

आयोगले हाल देशभरमा १ करोड ८५ लाखको हाराहारीमा मतदाता पुगेको अनुमान गरेको छ। २०७४ सालको प्रतिनिधि सभा तथा प्रदेश सभा निर्वाचनमा मतदाताको संख्या १ करोड ५४ लाख थियो । ​

  • १६ फागुन २०७८, सोमबार १३:३८ मा प्रकाशित
  • Nabintech